Jawaban:

PUTRI BIYUKU

CERITA TUTUR ANDE-ANDE PANJANG (BANYUASIN)

Penulis Cerita Tutur: Irwan P. Ratu Bangsawan

Assalamu’alaikum Wr. Wb.

Hadirin jiron tetangge yang hamba hormati

Izinke hamba becerite tentang kiseh di ini neg’ri

Kiseh ini tentang seorang putri

Die dikutuk karne tak pacak jege diri

ooOoo

Tesebutlah kiseh ade sebueh kerajaan

Yang sangatlah megah di tengah hutan

Tapi sayang rajenye bengis buken buatan

Rakyatnye sengsare kurang gizi kurang makan

Raje tu selalu bebuet idek adil ngan selalu mentingke dirinye dewek. Karne tu, rakyat sangat menci rajenye. Tapi, rupenye raje tu punye permaisuri yang be’ek atinye, idek milok-milok care lakinye. Sang permaisuri tau bahwe penyebab raje beperangai jehet karne raje belum ade keturunan. Kalu bahase kite mek ini ari, raje tu lagi “stress”.

Permasuri susah tidok susah makan

rainye masam cak cuke makan

Permaisuri perasaannye idek keruan

Hatinye kosong cak idek betuan

Jedi, setelah sekian lame kawin, raje belum ade sikok pun anak keturunan. Sang permaisuri merase besalah karne die lum pacak ngenjuk anak ke lakinye.

Alkiseh, suatu ari permaisuri jedi sakit. Raje sedih idek tetahanke karne raje sayang sangat dengan permaisurinye. Raje pun manggil tabib kerajaan. Sang tabib merikse permaisuri dengan seksame. Ape kate tabib?

Duhai raje mohon ampun hamba ucapke

Alhamdulillah selamat hamba sampaike

Junjungan hamba haruslah besuke cite

Permaisuri mengandung itulah sebabnye

Raje senang sangat nengar kabar bahwa permaisuri hamil. Raje lalu ngumumke bahwa kerajaan nak ngadeke pesta besak-besakan. Rakyat bahagie sangat karne kerajaan nak punye penerus tahta kerajaan.

Raje senang bukan kepalang

Permaisuri pun disayang-sayang

Perutnye dipegang-pegang

Putra mahkota ade dibayang-bayang

Alkiseh, akhirnye permaisuri pun melahirke. Seluruh rakyat lah bekumpul. Senanglah ati rakyat sekalian karne penerus tahta sudahlah lahir.

Tapi, sayang seribu kali sayang

raje kecewa buken kepalang

Raje merase sangatlah malang

Putra mahkota ideklah detang

Raje tekejut ngan kecewa sangat karne yang lahir rupenye putri, tapi raje idek nak ngerusak kebahagian permaisuri ngan rakyatnye. Raje nyadari harus besyukur walaupun anak yang dilahirke permaisurinye bukenlah cak yang dikendakinye.

Putri tu dinjuk name Putri Biyuku. Putri Biyuku artinye putri kure-kure karne pade waktu putri dilahirke muncul segerombolan kure-kure yang besak sangat di depan istana raje. Kure-kure tu milu nunggu kelahiran Putri Biyuku. Setelah Putri Biyuku lahir, segerombolan kure-kure itu pun pegi ninggalke kerajaan.

Sekarang raje jedi raje bijaksane

raje senang punye putri cantik jelite

Putri Biyuku hidup bahagie

Rakyat jedi makmur seneg’ri raye

Wahai hadirin bijak bestari, cerite ini rupenye idek selalu bahagie. Rupenye, saat lah gedis, Putri Biyuku berubeh perangainye. Sang putri jedi sombong ngan angkuh. Raje sedih siang ngan malam. Raje nak ngubah perilaku sang putri supaye putrinye jedi putri yang santun ngan be’ek perangainye.

Raje ngadeke sayembare ke seluruh neg’ri

Barang siape yang pacak ngubeh perilaku putri

Kalu bujang jedi laki sang putri

Kalu tue jedi dulur penguase negeri

Benyak lanang yang milu seyembara itu. Tapi, Putri Biyuku selalu menghine peserta sayembare.

Alkiseh, detanglah bujang yang buruk rupenye lagi pule miskin. Bujang tu rupenye depat hinaan cak peserta yang lainnye. Die dikateke idek tau diri. Lah buruk rupe ngan miskin, tapi bereni milu sayembara.

Alkiseh diceriteke bahwe bujang itu tau-tau berubeh jedi bujang tampan. Rupenye, bujang tu merupeke pangeran dari langit yang detang ke bumi untuk nyadarke sang putri. Sang pangeran akhirnye mutuske untuk menghukum sang putri menjadi seekor biyuku alias kure-kure.

Sang Putri pun jedi kure-kure

Bejelen lambat idek tekire

Masuk sungai idup sengsare

Akibet die idek pacak dimaafke

Sang Putri masuk sungai di tengah hutan

Menanggung derite seluas lautan

Raje sedih bukan buatan

Hutan Biyuku disebut dalam ingatan

Sanak dulur, jiron tetangge, be’ek jeoh maupun dekat, mektulah kiseh deri Putri Biyuku. Hutan tempat sang putri masuk ke sungai tu lame-lame jedi dusun yang disebut Dusun Biyuku.

Semoge cerite ini pacak jedi pelajaran untuk kite gele-gele. Sebelum hamba menutup ini cerite, izinke hamba sedikit bepantun:

Mantang para di tengah utan

Pegi ke dusun betemu kerie

Kiseh ini jedike panutan

Supaye kite jedi manusie mulie

Akhirnye, izinke hamba menutup ini cerite. Mohon maaf kalu ade salah kate. Kite manusie pasti ade khilaf dan lupe. Semoge kite kite betemu lagi di lain cerite.

Wassalamu’alaikum warohmatullahi wa barokaatuh