Jawaban:

Dina seni Sunda, aya sawatara rupa lagu, diantarana nyaeta kawih, kakawihan, jeung tembang. Naon bedana kawih, kakawihan, jeung tembang ?. Nanon sababna lagu Sunda Mawar Bodas disebutna kawih Mawar Bodas ?. Kunaon lagu Mawar Bodas henteu disebut kakawihan Mawar Bodas atawa tembang Mawar Bodas ?.

Kawih nyaeta lalaguan Sunda bebas anu henteu kaiket ku guru lagu jeung guru wilangan. Kakawihan oge sarua jeung kawih, nyaeta lalaguan Sunda bebas anu henteu kaiket ku guru lagu jeung guru wilangan, bedana kakawihan mah sok dinyanyikeun dina waktu keur ulin atawa keur digawe. Sedengkeun tembang nyaeta lalaguan Sunda anu kaiket ku guru lagu jeung guru wilangan.

Sanajan kawih teh teu kaiket ku guru lagu jeung guru wilangan, kawih tetep mangrupakeun hiji karya sastra wangun puisi anu ngabogaan sawatara unsur. Unsur-unsur nu aya dina kawih nyaeta unsur tema atawa jejer, rasa, nada, jeung amanat. Unsur amanat hiji kawih nyaeta mangrupakeun pasualan atawa perkara anu hayang ditepikeun ku anu ngahaleuangkeun atawa anu ngarang kawih ka anu ngaregepkeun atawa anu maca kawih.

Eusi nu aya dina Kawih Mawar Bodas nyaeta nyaritakeun saurang lalaki anu ngajugjug ka hiji lembur. Sanajan kudu ngaliwatan jalan satapak jeung hujan dor dar gelap, tapi kacape jeung awak baseuh rancucut teh teu dirasa sabab eta lalaki teh sumanget aya nu rek dituju nyaeta rek manggihan pikabogoheun. Tapi teu disangka-sangka, anu jadi pikabogoheun teh geus aya nu boga. Kacida kuciwana eta lalaki teh, rek balik oge jadi hoream. Tapi sanajan kitu eta lalaki teh embung katutuluyan mikiran anu bakal pipanyakiteun. Anu jadi amanat tina kawih Mawar Bodas teh yen umpama manggih anu pikasediheun jeung rasa kuciwa, ulah nepika jadi katutuluyan.