Jawaban:

Mula bukane madege desa Bugel kuwi nalika pertengahan abad XVI. Nalika semana ana Waliullah kang rawuh ing tanah Jawa. Penjenengane kagungan asmaMaulana Mangun Sejati. Maulana Mangun Sejati utawa kang kawentar kanthi asma Syekh Maulana asale saka Arab lan ngumbara tekan nuswantara saperlu dakwah nyebarake agama Islam. Olehe ngumbara tekan tanah Jawa ora gampang, Akeh pepalang kang dialami. Senajan mangkono, sekabehane pepalang ora nyuda anggone labuh kanggo dakwah. Kabeh pepalang diadhepi kanthi sabar, mula Maulana Mangun Sejati bisa tumeka ing Jepara.

Ing satengahe dalan dumadakan ana grompolan rampok kang ngadhang Syeh Maulana. Grombolan rampok mau cacahe wong sepuluh. Wong akeh rampok mau pengin ngrampas barang-barang gawane Syeh Maulana Syeh Maulana ora wedi ngadhepi para rampok mau. Panjenengane ora kersa menehake barang-barange. Syeh Maulana kukuh njaga bandha donyane supaya ora dijaluk para rampok. Kahanane nggegirisi banget, amarga para rampok ngupaya ngrampas bandha donyane. Syekh Maulana wis ora bisa ngendhani meneh gelutan karo para rampok.

Grombolan rampok nyerang Syekh Maulana. Para rampok nggawa gebug saka kayu. Kanthi bebarengan para rampok mau nyerang Maulana Mangun Sejati. Gebug kayu mau dikeprukake ing badane Syeh Maulana. Ananging, nalika gebug kayu mau ngenani badane Syeh Maulana, gebug kayu mau padha tugel dadi cilik-cilik. Ora mangu mangu meneh, Maulana Mangun Sejati kagungan kasekten kang ngedab-edabi. Perkara kuwi mau ndadekake para rampok padha wedi. Grombolan rampok mau ora nyana yen gebug kayu kang digunakake, bisa ajur kanthi gampang amarga kena badane Syeh Maulana.Para rampok mau pungkasane mung pasrah. Sekabehane padha ngakoni kasektene Maulana Mangun Sejati. Syekh Maulana menehi pangapura marangtumindake grombolan rampok mau. Wusanane, para rampok mau dadi murid lan

pandhereke Syekh Maulana. Kanggo ngeling-eling kedadean mau, papan panggonan kuwi diarani Bugel. Tembung Bugel asala saka tugel-tugel, yaiku kedadean gebug kayu kang tugel-tugel. Panggonan kuwi mau sansaya regeng, akeh wong-wong kang mapan ana kono. Mula, sansaya suwe sansaya ngrembaka dadi sawijining dukuh lan desa kang kawentar kanthi aran Desa Bugel. Pasareane Mulana Mangun Sejati kang mapan ana ing desa kono, asring ditekani para peziarah. Makam kuwi dipercaya dening bebrayan nduweni karomah, mula akeh para peziarah kang teka saka kutha liya.