Jawaban:

Dina puisi Sunda, aya hiji wanda puisi anu disebut carita pantun. Umpama ditilik tina eusina, puisi Sunda dibagi jadi dua kelompok, nyaeta puisi anu eusina mangrupa carita jeung puisi anu eusina henteu mangrupa carita. Conto puisi anu eusina mangrupa carita nyaeta carita pantun jeung wawacan. Sedengkeun conto puisi anu eusina henteu mangrupa carita nyaeta sisindiran, mantra, guguritan jeung kakawihan.

Carita pantun eusina dibagi jadi genep bagian, nyaeta bagian rajah, bagian narasi, bagian deskripsi, bagian dialog, bagian mnolog jeung bagian rajah panutup. Dina bagian deskripsi, aya eusi deskripsi anu dibacana sok bari dihaleuangkeun, kusabab kitu sok disebut oge "papantunan". Papantunan dina bagian deskripsi ieu mangrupakeun bagian anu dipikaresep ku anu lalajo.

Umpama dibandingkeun, carita pantun atawa papantunan, beda jeung pantun nu aya dina basa Indonesia. Pantun anu aya dina basa Indonesia mah nyaeta sarua jeung sisindiran nu aya dina basa Sunda. Saperti disebutkeun di luhur, dina puisi Sunda, sisindiran kaasup puisi anu eusina henteu mangrupa carita. Sedengkeun carita pantun nyaeta wanda puisi anu eusina mangrupa carita. Jadi carita pantun atawa papantunan hartina beda jeung pantun anu aya dina basa atawa sastra Indonesia.

Carita pantun teh mangrupakeun karya sastra Sunda anu ayeuna mah geus langka. Dina tahun 50an carita pantun kungsi ngalaman masa-jayana. Carita pantun teh dina magelarkeunnana sok dibarengan ku kacapi.