Sekolahku

Bangunan kang megah

Ayem, endah lan asri

Nambahi bungah atiku

Nambahi semangat siswa siswine

Golek ilmu kanggo mbesukke

Saben dino aku ngrungokke piwulange guru

Ora tau mbadal yen dituturi

Merga aku ngerti yen guru iku digugu lan ditiru

Tambah dina tambah marem atiku

Sekolah menyang SMP

Sing tambah maju prestasine

Pahlawanku

Pahlawan, sliramu dadi dalan kemerdekaan

Tadak awak ora wedi marang kematian

Nyowomu kanggo pondasine kebebasan

Kanggo rakyat saking cengkramane penindasan

Pahlawan, awan bengi nantang maut

Nglawan misil-misil kang semrawut

Kabeh lawan koe ajak gelut

Ra peduli najan awak podo benjut

Pahlawan, semangatmu koyo geni

Ngobong kabeh pasukane kompeni

Kanggo njaga lemah kang ditresnani

Indonesia merdeka, Indonesia dihormati

Pitulas Agustus taun papat lima

Opo sing diimpekke dadi nyata

Saiki Indonesia wes merdeka

Pahlawan, perjuanganmu ra sia-sia

Indonesia merdeka!!!

Indonesia merdeka!!!

Kabeh mergo perjuanganmu

Endahe Alam

Yen mandheng alam iki

Pikiran susah dadi endah

Anggugah semangat urip kanggo jiwa iki

Ati pun dadi sumringah lan bungah

Yen ndelenguwit ijo royo-royo

Awujud ciptaan sing kuasa

Lan kesucian sinar surya

Kanggo pandange duniya iki

Puji syukur marang Gusti Allah

Marang keindahan isi bumi

Sing kudu dijaga lan dilestarikne

Tanpa ngilangake keindahane

Kabudayan Jawa

Zaman saiki kabeh wis padha lali

Lali karo kabudayan Jawi

Kabudayan kang mbiyen diuri-uri

Saiki rangerti mbuh nangendi

Wayang, jathilan, krama alus nangdi saiki

Kabeh podho ora peduli

Kabudayan jawi wis ilang saking bumi

Bocah saiki mung isoh dolan wira-wiri

Dangdutan wayah bengi

Kelingan zaman saiki

Mung agawe nangis lan loro ati

Ayo para bocah-bocah

Agawe kabudayan jawi dadi lestari

Kanggo merdekaake negeri iki

Ibu

Rasa asihmu marang siwi

Kadidene banyu mili

Kang ora pedhot ing margi

Senadyan kebak pepalang

Oyot, uwuh, lendhut ugo watu

Ora bisa mbendhung rasa asihmu

Marang anakmu

Nalika bumi isih sepi

Nalika tengah wingi durung lingsir

Isih ketutup pedhut

Nalika anakmu isih mesem ngguyu ing alam impen

Ibu wiwit gumregah

Mbasuh pasuryan toya suci

Tumungkul pangestu puja

Masrahke jiwa lan raga

Nyenyuwun marang murbeng dumadi

Dimen diparingi pepadhang dalan bebrayan

Dimen diparingi pepadhang, marang putra putrine

Nggayuh gegayuhan

Kanggo sanguning urip ing tembe

Lelabuh lan rasa asih kang tanpa kendhat

Lumintu

Rasa asih marang siwi

Tansah kaya banyu mili