Naon bedana wawacan jeung novel?

Wawacan jeung novel miboga sasaruaan, nyaeta dua-duana mangrupakeun karya sastra anu eusina mangrupa carita. Naon anu ngabedakeun wawacan jeung novel?. Wawacan nyaeta karya sastra dina wangun ugeran atawa puisi. Sedengkeun novel nyaeta karya sastra dina wangun lancaran atawa prosa. Jadi bedana anu utama tina wawacan jeung novel nyaeta yen wawacan mah kaasupna teh kana puisi sedengkeun novel mah kaasupna teh kana prosa.

Umpama ditilik tina eusina, aya dua rupa puisi Sunda, nyaeta puisi anu eusina mangrupa carita jeung puisi anu eusina henteu mangrupa carita. Conto puisi Sunda anu eusina mangrupa carita nyaeta saperti wawacan jeung carita pantun. Sedengkeun conto puisi Sunda anu eusina henteu mangrupa carita nyaeta saperti sisindiran, mantra, guguritan, sajak, jeung kawih.

Aya dua rupa karya sastra wangun prosa, nyaeta anu disebut prosa buhun jeung prosa anyar atawa modern. Conto karya sastra anu kaasup kana prosa buhun nyaeta saperti dongeng jeung carita wayang. Sedengkeun conto karta sastra anu kaasup prosa anyar nyaeta saperti carita pondok atawa carpon, jeung novel.

Carita anu aya dina novel biasana panjang, kitu oge carita nu aya dina wawacan. Sanajan wawacan teh mangrupa karya sastra wangun puisi, tapi bisa miboga carita anu panjang pisan saperti carita nu aya dina novel. Rumpaka nu aya dina wawacan kaiket ku aturan anu geus tangtu, nyaeta aturan pupuh. Aturan atawa patokan nu aya dina pupuh disebutna guru lagu jeung guru wilangan. Jadi wawacan mah karya sastra wangun puisi anu kaiket ku guru lagu jeung guru wilangan, sedengkeun novel mah karya sastra wangun prosa anu geus tangtu teu kaiket ku aturan, saperti guru lagu jeung guru wilangan.