Pengertian carita pantun dalam bahasa sunda

Carita pantun nyaeta salahsahiji rupa karya sastra Sunda wangun ugeran atawa puisi. Naha aya karya sastra wangun puisi anu eusina mangrupa carita, saperti carita pantun?. Umpama ditilik tina wangun eusina, aya dua rupa puisi Sunda, nyaeta puisi anu eusina mangrupa carita jeung puisi anu eusina henteu mangrupa carita. Conto puisiSunda anu eusina mangrupa carita nyaeta carita pantun jeung wawacan. Sedengkeun conto puisi Sunda anu eusina henteu mangrupa carita nyaeta sisindiran, mantra, guguritan jeung sajak.

Jadi, sanajan carita pantun teh mangrupa karya sastra wangun puisi, carita pantun teh sok dipagelarkeun saperti ngadongeng carita anu dibarengan ku kacapi. Carita pantun teh mangrupakeun karya sastra Sunda anu ayeuna mah geus langka. Dina tahun 50an carita pantun kungsi ngalaman masa-masa-jayana.

Umpama ditilik tina strukturna, carita pantun teh dibagi jadi genep bagean. Bagen-bagean anu aya dina carita pantun nyaeta bagean rajah, bagean narasi, bagean deskripsi, bagean dialog, bagean monolog jeung bagean rajah panutup. Dina bagean deskripsi, aya eusi deskripsi anu dibacana bari sok dihaleuangkeun, kusabab kitu eusi anu aya dina bagean deskripsi sok disebut "papantunan". Papantunan anu aya dina bagean deskripsi mangrupakeun bagean anu sok dipikaresep ku anu lalajo carita pantun.

Carita pantun atawa papantunan, umpama dibandingkeun jeung pantun anu aya dina sastra Indonesia, beda. Ari pantun anu aya dina sastra Indonesia mah nyaeta sarua jeung sisindiran anu aya dina sastra Sunda. Saperti disebutkeun di luhur, dina puisi Sunda, sisindiran kaasupna teh kana puisi anu eusina henteu mangrupa carita. Sedengkeun carita pantun mah nyaeta wangun puisi anu eusina mangrupa carita. Jadi, carita pantun atawa papantunan hartina beda jeung pantun anu aya dina sastra Indonesia.